ဖရဲခင်းမှာ သီးကင်းတွေပုပ်ပြီး မကြွေအောင်နဲ့ အသီးတင်အားကောင်းအောင် ဘယ်လိုလုပ်ရမလဲ

ဖရဲစိုက်တဲ့အခါ အသီးသီးဖို့၊အသီးတင်ဖို့၊သီးကင်းလေးတွေပုပ်ပြီး မကြွေဖို့က ရေသွင်းတဲ့အပေါ်မှာ အများကြီးမူတည်ပါတယ်။ ရေသွင်းမှန်ဖို့လိုပါတယ်။ သဲဆန်တဲ့မြေဖြစ်ရင် ရေပိုသွင်းရပါတယ်။ ရာသီဥတုအခြေအနေ၊မြေအမျိုးအစားတွေကို ကြည့်ပြီး ရေကို အသီးသီးမယ့်အချိန်၊ ပန်းဖြိုင်ဖြိုင်ပွင့်တဲ့အချိန်တွေမှာ ရေအရမ်းလိုတဲ့အချိန်တွေဖြစ်ပါတယ်။ ရေသွင်းတာနည်းရင် အသီးတင်တာ၊အသီးသီးတာ နည်းမယ်။ ရေသွင်းတာများသွားရင်လည်း အသီးအူချောင်မယ်၊ အသီးခွံကွဲမယ်၊ အသီးကြွေမယ် စတာတွေဖြစ်ပါတယ်။ ရေသွင်းရင်လည်း မနက်ခင်းပိုင်းသွင်းတာက အမြစ်တွေ ကြီးထွားဖွံ့ဖြိုးဖို့ ကောင်းစေပါတယ်။ မိုးများများရွာခဲ့ရင်၊ရေဝပ်ရင်ရေထုတ်ပေးဖို့လိုပါတယ်။

• ဖရဲပင်တွေမှာ နွယ်တွေ အရမ်းရှုပ်တွေးပြီး ရှည်နေရင်လည်း လေဝင်လေထွက်ညံ့ပြီး အပွင့်ကြွေ၊အသီးမတင်နိုင်ပါ။

• ဝတ်မှုံကူးတာ မအောင်ရင်လည်း အသီးမတင်နိုင်သလို တင်တဲ့အသီးတွေလည်း ပုပ်ပြီး ကြွေနိုင်ပါတယ်။ ဝတ်မှုံကူးတာကို သဘာဝအတိုင်း ပျား၊ပိတုန်း စတဲ့အင်းဆက်တွေက ကူညီပေးပါတယ်။

• လူကနေပြီးတော့ မနက်(၆-၈)နာရီအတွင်းမှာ ပွင့်နေတဲ့ အဖိုပွင့်နဲ့ အမပွင့်တွေကို မျက်နှာချင်းဆိုင်အပ်ပြီး လှည့်ပြီးပွတ်ပေးလို့လည်းရပါတယ်။ အမပွင့်တစ်ပွင့်ကို အဖိုပွင့်(၃)ပွင့်နဲ့ ပွတ်ပြီး လူနဲ့ ဝတ်မှုံကူးပေးပါ။ မျိုးပိုအောင်ပြီး အသီးပိုတင်ပါတယ်။ သတိပြုရမှာက ဖရဲပင်အမပွင့်တစ်ပွင့်က နှစ်ရက်ပဲ ဝတ်မှုံကို လက်ခံနိုင်ပါတယ်။ ဒါကြောင့်ပန်းပွင့်တဲ့အချိန်ကို ပိုပြီးဂရုစိုက်ပေးပါ။

• အသီးတင်တာက သီးကိုင်းမွေးတာနဲ့လည်းဆိုင်ပါတယ်။ အပင်အရွက် (၃-၄)ရွက်ထွက်တဲ့အချိန်မှာ ထိပ်ညွန့်ကို ဖြတ်ပေးပါ။ အတက်(၃-၄)ကိုင်းမွေးမြုပါ။ ပင်ခြေကနေ (၃)ပေအကွာ အဆစ် (၁၃-၁၄)ဆစ်မှာ အသီးယူပါ။ ကျန်တဲ့ အတက်တွေကို ဖဲ့ပေးပါ။ အဆစ်(၂၇-၂၈)မှာ အညွန့်ဖြတ်ပေးပါ။ နွယ်ကိုင်းတွေမရှုပ်အောင်ထားပါ။ တစ်ခုနဲ့တစ်ခုမထပ်အောင် ဖြန့်ချပါ။ တစ်ပင်ကို သီးလုံး(၁)လုံးယူမှ အသီးကြီးပြီး အရည်အသွေးကောင်းစေမှာဖြစ်ပါတယ်။

• အမပန်းပွင့်ချိန်မှာ (၁၅)ပတ်လည် ကွန်ပေါင်းမြေသြဇာကို တစ်ဧက တစ်အိတ်ကျွေးပါ။ အသီးတင်ချိန်မှာ ပုလဲအိတ်ဝက်နဲ့ ကွန်ပေါင်းမြေသြဇာ အိတ်ဝက်ကျွေးပါ။ ကယ်လ်ဆီယမ်နဲ့ ဘိုရွန်လည်း ကျွေးဖို့လိုပါတယ်။

www.shwetheenhan.com